5 netë që e kthejnë qytetin në festë
Ka disa evente që, me kalimin e viteve, bëhen pjesë e identitetit të një qyteti. “Festa e Birrës” në Korçë është pikërisht një prej tyre. Në vitin 2026, festivali ka 20 vjetorin e tij, duke shënuar dy dekada nga nisja e një eventi që është kthyer në një nga ngjarjet më të njohura të verës shqiptare.
Nga 12 deri më 16 gusht 2026, Korça do të presë edicionin jubilar, këtë herë në Polin e Eventeve në Drenovë, një hapësirë e re për festivalin.
Nga një festë lokale në një ngjarje të madhe verore
“Festa e Birrës” nisi në vitin 2007, si një iniciativë e Bashkisë Korçë. Në këto dy dekada, eventi është rritur gradualisht dhe është shndërruar në një nga arsyet pse shumë vizitorë zgjedhin Korçën gjatë gushtit.
Sipas “Destination Management Organization” (DMO) Korça, festivali ka ndikuar edhe në promovimin turistik të rajonit dhe është vlerësuar me Çmimin e Turizmit në vitin 2010.
Sot, “Festa e Birrës” është një kombinim i muzikës live, gastronomisë, atmosferës së qytetit dhe mikpritjes korçare. Për pesë net, Korça merr një ritëm tjetër dhe hapësirat e festivalit mbushen me vizitorë nga Shqipëria dhe rajoni.
20 vjetori sjell një skenë të re
Një nga ndryshimet kryesore të këtij viti është vendndodhja. Për edicionin jubilar, festivali zhvendoset në Polin e Eventeve në Drenovë, ku organizatorët kanë parashikuar një infrastrukturë më të përshtatshme për një event të përmasave të mëdha.
Edicioni i 20-të synon të jetë edhe një përvojë më vizuale. Organizatorët kanë paralajmëruar përdorimin e teknologjive dhe efekteve skenike të reja, duke e vendosur spektaklin dhe performancën artistike në qendër të programit.
5 netë me muzikë
Muzika mbetet një nga shtyllat kryesore të festivalit. Programi i 20 vjetorit përfshin artistë të njohur shqiptarë dhe ndërkombëtarë, mes tyre Alban Skënderaj, Aurela Gaçe, Dafina Zeqiri, Anxhela Peristeri, Ylli Limani, Luiz Ejlli, Endri & Stefi dhe Triantafillos, së bashku me artistë të tjerë.
Kështu, pesë netët e festivalit do të ndërthurin zhanre dhe gjenerata të ndryshme, duke e bërë programin një prej pikave kryesore të këtij edicioni jubilar.
Një festival që të fton të njohësh qytetin e jo vetëm
Ajo që e ka bërë “Festën e Birrës” të veçantë ndër vite është edhe lidhja e saj me vetë qytetin. Një vizitë në Korçë gjatë festivalit nuk përfundon te skena. Është mundësia për të ecur në Pazarin e Vjetër, për të dëgjuar serenatat, për të vizituar muzetë e shumtë e të ndryshëm, për të shijuar kuzhinën lokale dhe për të parë një qytet që ka vlera të mëdha historike e kulturore për vendin.
Në këtë kuptim, Festa e Birrës është bërë pjesë e kalendarit turistik të Korçës dhe një nga eventet që e vendos qytetin në vëmendjen e vizitorëve vendas dhe të huaj dhe është një nga eventet më të mëdha turistike verore në Shqipëri.
20 vjet më pas
Dy dekada janë mjaftueshëm për ta kthyer një event në traditë. Për Korçën, 20 vjetori i “Festës së Birrës” është edhe një moment për të parë se si një aktivitet veror mund të rritet, të ndryshojë hapësirën e tij dhe të ndërtojë një identitet që lidhet me qytetin.
Nga 12 deri më 16 gusht, Korça do të ketë sërish pesë net të mbushura me muzikë, njerëz dhe atmosferë festive.
Festa e Birrës Korçë 2026
Poli i Eventeve, Drenovë
12–16 gusht 2026
Hyrja në festival është pa pagesë; për zonat me tavolina ofrohen rezervime online.