Artistja shqiptare Bruku Velo ka marrë pjesë së fundmi në një ekspozitë ndërkombëtare prestigjioze të mbajtur në Monako, e organizuar nga platforma artistike Artf3, ku morën pjesë dhjetëra krijues nga vende të ndryshme të botës.
Ekspozita kishte në qendër artin bashkëkohor dhe forcat e reja krijuese, duke prezantuar piktura, instalacione dhe vepra të artit pamor që reflektonin temat më aktuale të shoqërisë moderne: identitetin, mjedisin, transformimet kulturore dhe botën shpirtërore të individit. Ky aktivitet u zhvillua në një prej hapësirave më të njohura të Monakos, duke tërhequr vizitorë nga bota e artit, koleksionistë dhe kritikë të profilit të lartë.
Bruku Velo, me stilin e saj të veçantë që ndërthur ngjyrat e forta dhe kompozimet emocionale, tërhoqi vëmendjen e publikut dhe kritikëve. Punimet e saj pasqyrojnë një qasje ku intuita dhe emocioni janë në qendër, duke krijuar një lidhje të drejtpërdrejtë mes shikuesit dhe telajos.
“Është një emocion i jashtëzakonshëm të përfaqësosh Shqipërinë në një event të tillë ndërkombëtar, ku arti shndërrohet në një urë komunikimi mes popujve,” u shpreh Velo pas hapjes së ekspozitës.
Kjo pjesëmarrje jo vetëm që forcon profilin e saj si artiste që ka kaluar kufijtë kombëtarë, por gjithashtu afirmon vendin e Shqipërisë në hartën e ngjarjeve ndërkombëtare të artit bashkëkohor. Ekspozita e organizuar nga Artf3 është konsideruar një prej platformave më dinamike për promovimin e artistëve të rinj dhe të afirmuar, duke krijuar ura bashkëpunimi mes vendeve dhe kulturave të ndryshme.