Muzika dhe komunitetet vllaho-arumune në Europën Juglindore: Shtigje njohëse – Nga Mikaela Minga

Praktikat dhe shprehjet muzikore të minoritetit vllaho-arumun në Europën juglindore përbëjnë një shembull të përveçëm rreth mënyrës si këto komunitete kanë jetuar në këto vende duke bashkëndarë kulturën e tyre me atë të grupeve të tjera etnike, qofshin këto shumica, apo pakica. Propozojmë në këtë prezantim disa piketa për t’i njohur, qoftë në një rrafsh historik, duke filluar nga filmimet e hershme të valleve tradicionale të realizuara nga vëllezërit Manaki deri te aspekte më bashkëkohore të lidhura me kërkimin tim etnomuzikologjik, dokumentimin, kjo në një gjeografi që shkon përtej kontekstit shqiptar.

Short bio e autores

Mikaela Minga është etno/muzikologe. Merret me praktika të ndryshme muzikore të arealit ballkanik e mesdhetar; me muzikat e shekullit të njëzetë, si dhe me lidhjet e muzikës me kinemanë dhe multimedian në përgjithësi. Në fokus më specifik të saj kanë qenë aspekte të caktuara të kulturave urbane ballkanike e mesdhetare; dukuri dhe zhvillime muzikore të lidhura me periudhën diktatoriale dhe postdiktatoriale në Shqipëri, parë qoftë në kuadrin e ngushtë krijues artistik, ashtu edhe në një rrafsh social-kulturor. Është autore e disa librave dhe e një numri të konsiderueshëm artikujsh dhe esesh të botuara në organet e medias së shkruar dhe asaj online.

Photo credits: Julia-Anna Gospodarou “Flowing Dance-Malet e Pindit”.