Hollywood-i festoi mbrëmë edicionin e 83-të të Çmimeve Golden Globes, një nga stacionet më të rëndësishëm në rrugën drejt Oscarëve. Më të mëdhenjtë e industrisë u mblodhën në Beverly Hills për një mbrëmje që ndërthurte glamurin, emocionet dhe mesazhe të forta artistike por dhe shoqërore.
Në qendër të vëmendjes ishte Timothée Chalamet, i cili më në fund arriti fitoren e tij të parë në Golden Globes pas pesë nominimesh. Aktori 30-vjeçar u shpall aktori më i mirë në një film muzikal ose komedi për rolin e tij në “Marty Supreme”, duke lënë pas emra të mëdhenj si Leonardo DiCaprio dhe George Clooney. Fitorja e tij u pa gjerësisht si një shtysë e fortë në garën drejt çmimit Oscar.
Në fjalimin e pranimit, Chalamet foli me përulësi për rrugëtimin e tij dhe për rëndësinë e mirënjohjes, një vlerë që, sipas tij, ia ka rrënjosur i ati që në fëmijëri. Ai nuk harroi të falënderonte prindërit dhe partneren e tij, Kylie Jenner, duke e bërë momentin edhe më personal e emocional.
Edhe pse Leonardo DiCaprio nuk arriti të fitojë personalisht, filmi i tij “One Battle After Another” ishte një nga fituesit më të mëdhenj të mbrëmjes. Me gjithsej katër çmime, përfshirë filmin më të mirë muzikor ose komedi dhe çmimet për regjisorin dhe skenarin më të mirë për Paul Thomas Anderson, filmi u konfirmua si një nga prodhimet më të vlerësuara të vitit.
Në kategoritë dramatike, surpriza e madhe e natës ishte “Hamnet”. Aktorja irlandeze Jessie Buckley u shpall aktorja më e mirë në dramë për rolin e saj në adaptimin e romanit të Maggie O’Farrell, ndërsa filmi fitoi edhe çmimin për filmin më të mirë dramatik. Buckley e përshkroi fitoren si një “nder të vërtetë”, duke theksuar natyrën ndërkombëtare të ekipit që qëndronte pas filmit. Regjisorja Chloe Zhao u shfaq dukshëm e prekur, ndërsa producenti Steven Spielberg vlerësoi vizionin e saj unik për ta sjellë këtë histori në ekran.
Një nga momentet më emocionale të mbrëmjes erdhi nga Teyana Taylor, e cila fitoi çmimin për aktoren më të mirë mbështetëse për “One Battle After Another”. Me lot në sy, ajo iu drejtua “motrave dhe vajzave të vogla me ngjyrë”, duke përcjellë një mesazh fuqizues për përkatësi, zë dhe ëndrra pa kufij.
Ndërkohë, aktori suedez Stellan Skarsgård fitoi çmimin për aktorin më të mirë mbështetës për filmin “Sentimental Value”, duke kombinuar humorin me një thirrje të zjarrtë për ta parë kinemanë në ekranin e madh, jo vetëm në platformat digjitale.
Në kategoritë e tjera, Rose Byrne u shpall aktorja më e mirë në një film muzikal ose komedi për “If I Had Legs I’d Kick You”, ndërsa “KPop Demon Hunters” fitoi çmimin për filmin më të mirë të animuar. Trilleri politik brazilian “Agjenti Sekret” u shpall filmi më i mirë ndërkombëtar, me Wagner Moura që fitoi edhe çmimin për aktorin më të mirë në dramë, duke e cilësuar filmin si një reflektim mbi traumat dhe vlerat që kalojnë brez pas brezi.
Edhe televizioni pati vendin e vet të rëndësishëm në Golden Globes. Seriali i Netflix “Adolescence” u dallua me disa çmime, përfshirë fitoren e adoleshentit britanik Owen Cooper si aktori më i mirë mbështetës. Vetëm 16 vjeç, Cooper u shfaq modest dhe i habitur nga suksesi, duke e mbyllur fjalimin e tij me moton e Liverpool FC: “Nuk do të ecësh kurrë vetëm”.
Seth Rogen fitoi çmimin për aktorin më të mirë në një komedi televizive për “The Studio”, duke ironizuar faktin se dikur kishte xhiruar një episod të serialit pikërisht në Golden Globes. Fitues të tjerë televizivë përfshinë Jean Smart, Noah Wyle dhe Michelle Williams, ndërsa çmimi i parë për podkastin më të mirë iu dha Amy Poehler për “Good Hang with Amy Poehler”.
Golden Globes 2026 bëri bashkw yjet e industrisë së filmit dhe televizionit duke ndërthurur triumfin me emocionet personale. Me sytë tashmë nga Oscar, kjo natë shërbeu si paralajmërim i qartë se gara sapo ka hyrë në fazën e saj më interesante.