Pas disa ditësh të mbushura me filma, diskutime, disa episode podcast-i, “Tirana European Youth Film Festival” shpalli fituesit e këtij edicioni. Juria dhe publiku dhanë verdiktin e tyre, duke vlerësuar filmat më të mirë që sollën histori prekëse, vizion të fortë artistik dhe emocione të paharrueshme.
Fituesit sipas kategorive të çmimeve, janë si më poshtë:
Regjia më e mirë – “Forever Hold Your Peace” nga Ivan Marinović
Regjisori Ivan Marinović e kthen kaosin e një dasme të dështuar në një dramë të ndjerë, plot humor dhe ndjeshmëri. Performancat e aktorëve dhe rrëfimi i ndërtuar me kujdes e bëjnë këtë film një udhëtim emocional që publiku nuk do ta harrojë lehtë.
Skenari më i mirë – “Clearing” nga Magdalena Pięta
Një histori për humbjen dhe kujtesën, e shkruar me qartësi dhe ndjesi të thellë. Magdalena Pięta arrin të bashkojë zëra të ndryshëm në një rrëfim të fuqishëm mbi lidhjet njerëzore dhe misterin e kujtesës.
Kinematografia më e mirë – “Another German Tank Story” nga Jannis Alexander Kiefer
Me kujdes për çdo detaj, kinematografia e këtij filmi na zhyt në atmosferën e ngjarjeve historike dhe jetës së përditshme në një fshat të vogël. Çdo sekuencë filmike është e menduar për t’i dhënë historisë qartësi dhe forcë vizuale.
Çmimi special i jurisë – “Silence of Sirens”
Çmimi i shkoi aktorit Sunaj Raça, për interpretimin e tij prekës në rolin e Avniut. Ai arriti të shpalosë me ndershmëri dhe intensitet luftën e brendshme të personazhit, duke e bërë të ndjehej thellë nga publiku.
Filmi më i mirë i festivalit – “The House with No Address” nga Hatice Askin
Ky film shkëlqeu si në regji, skenar, kinematografi, interpretim dhe mesazh. Me tematikën e kujtesës, identitetit dhe koston e fshirjes, ai ofron një përvojë të plotë dhe të guximshme kinematografike, e cila e bën fituesin e merituar të edicionit 2025.
Çmimi i publikut – “E se mio padre” nga Solange Tonini
Publiku dha votën e tij, ku me mbi 600 pjesëmarrës që zgjodhën fituesin, filmi i Solange Tonini preku më shumë zemrat e shikuesve, duke marrë Çmimin e Publikut.
Ky edicion i “Tirana European Youth Film Festival” dëshmoi fuqinë e kinemasë për të lidhur njerëz, për të hapur biseda dhe për të frymëzuar brezin e ri të krijuesve. Fituesit e këtij viti na kujtojnë se kinemaja është një gjuhë universale që na bashkon përtej kufijve.