Ekspozitë “Venetiku: Gjurmëve të një fondi fotografik” te Muzeu “Marubi” Shkodër
𝐕𝐄𝐍𝐄𝐓𝐈𝐊𝐔: 𝐆𝐉𝐔𝐑𝐌𝐄̈𝐕𝐄 𝐓𝐄̈ 𝐍𝐉𝐄̈ 𝐅𝐎𝐍𝐃𝐈 𝐅𝐎𝐓𝐎𝐆𝐑𝐀𝐅𝐈𝐊
Kuruar nga Mikaela Minga.
📍 Hapja e ekspozitës
🗓 E premte, 16.10.2026, ora 18:00
🏛 Muzeu Kombëtar i Fotografisë “Marubi”
Ekspozita “𝐕𝐞𝐧𝐞𝐭𝐢𝐤𝐮: 𝐆𝐣𝐮𝐫𝐦ë𝐯𝐞 𝐭ë 𝐧𝐣ë 𝐟𝐨𝐧𝐝𝐢 𝐟𝐨𝐭𝐨𝐠𝐫𝐚𝐟𝐢𝐤” sjell në vëmendje historinë e studios fotografike Venetiku në Korçë, duke ndriçuar veprimtarinë e saj, njerëzit që e krijuan dhe e trashëguan, si dhe marrëdhënien e tyre me qytetin dhe zhvillimet historike e shoqërore të kohës.
Përmes kërkimit arkivor dhe dokumentimit historik, ekspozita synon të rindërtojë rrugëtimin e një fondi fotografik, duke e vendosur atë në kontekstin e jetëve individuale dhe të historisë së familjes Venetiku. Një vëmendje e veçantë i kushtohet Krisanthi Venetik-ut, përfaqësueses së fundit të studios, jeta e së cilës dëshmon për fatet komplekse dhe, në disa raste, tragjike të familjes.
Përtej vlerave fotografike dhe dokumentare, ekspozita trajton edhe marrëdhënien ndërmjet fotografisë, kujtesës dhe historisë. Përmes materialeve arkivore, përfshirë dokumente që lidhen me përndjekjen politike të pjesëtarëve të familjes Venetiku gjatë regjimit komunist, ajo sjell një këndvështrim mbi ndikimin e rrethanave historike në jetën dhe veprimtarinë e fotografëve.
“𝐕𝐞𝐧𝐞𝐭𝐢𝐤𝐮: 𝐆𝐣𝐮𝐫𝐦ë𝐯𝐞 𝐭ë 𝐧𝐣ë 𝐟𝐨𝐧𝐝𝐢 𝐟𝐨𝐭𝐨𝐠𝐫𝐚𝐟𝐢𝐤” përbën një përpjekje për të rikthyer në kujtesën kolektive historinë e një studioje fotografike dhe të njerëzve që qëndruan pas saj, duke kontribuar në njohjen dhe rivlerësimin e trashëgimisë fotografike shqiptare.
___________
Ekspozita realizohet në bashkëpunim me Institutin e Antropologjisë pranë Akademisë së Shkencave të Shqipërisë dhe Autoriteti për Informimin mbi Dokumentet e Ish-Sigurimit të Shtetit dhe prezantohet në Muzeun Kombëtar të Fotografisë “Marubi”, me mbështetjen financiare të Ministrisë së Turizmit, Kulturës dhe Sportit të Shqipërisë.
